琴日我地有個「生命重塑訓練營」，有班超老又扮候生既導師。一開始，我地就要去集隊，無咩野丫，好正常。然後上到禮堂，放底個袋，出去排好隊，亦係好正常。跟住個導師講左一大輪廢話，要我地聽到佢叫自己果班就舉手，大聲叫到。癡線！要我地越叫越大聲，但係佢支咪同果D所謂背景音樂蓋往晒我地把聲，又話唔夠大聲。唔夠大聲就罰掌上壓，我地班算罰得少。嗌完就係咁話佢自己罰人幾咁勁，又話咩升空，又話塞你落垃圾筒。伯伯，好心你啦，咪再講爛gag啦，你D gag唔好笑呀，明唔明呀？！你D gag全部集中係講屁股，你又話我地係中學生喇，唔係小學呀，咁你係咪當我地係小學先？擺到明係啦，邊個會笑呀？無人笑呀，咁你就咪講啦！唉，到簡導師「幫」我地，台上個阿sir比大佬sir我地，跟住又晒自己幾咁勁，跟佢果組好慘，但100%贏，超，你肯定呀？跟住又話跟大佬sir係無贏既機會。

落去集隊，大佬sir地慢左15秒，要我地做掌上壓15次。然後先教我地「打招呼」，話唔夠大聲，又罰立定既兔仔跳一邊跳，一邊講大佬sir叫我地講既野。罰完叫我地搵其他導師，跟住又話我地無講再見，要我地跳，要講「我以後要醒目D」。搞掂晒就上禮堂，要一邊慢跑，一邊叫自己個班。上到禮堂前面，維維姐姐擋住左個門口，大佬sir係咁後面叫「做咩無晒士氣呀？做咩唔快手D入去呀？」心諗：比人擋住左呀，好未？點入呀？踢開個姐姐入丫？後尾先
入得，差不多開始遊戲。第一個「遊戲」係鼻頂波，我要有份幫手推人上去，後尾到我既時候，佢地抱得超畸型，我都唔知點先伸直隻腳上去，伸我又怕踢到同學，我又因為o岩o岩比人罰左幾次跳，腳軟軟上唔到，佢地放番我落黎，大佬sir狂鬧我，話我做咩唔伸直隻腳。再上果時，我伸直隻腳，結果踢到同學，都未同佢講對唔住= ="。好煩囉，狂叫班名就有士氣架喇？我唔覺得囉。一邊舉人上去，一邊叫，覺得好煩呀，唔叫要罰原地跑。

到左午餐，又要講幾廿樣野，雖然叫食飯係有禮貌。但係乜唔可以集埋一次過叫晒架咩？禮貌唔會因為咁而無左架嘛。要唱校歌，但係要我地勁勁勁勁大聲唱出黎，唔夠大聲就出去跑。個個同學都逼於無奈一定要勁勁勁勁勁勁勁大聲唱，D導師話咁先有歸屬感，歸屬感係唔會因為唱得細聲而無左架，你要我地咁大聲唱，就等同嗌歌，嗌出黎既歌係絕對唔好聽，嗌歌我覺得反而侮辱左校歌，校歌本身個旋律好靚架！食飯要我地相親相愛咁食，唉，終於係午餐段時間可以鬆一口氣，我地同D同學係午餐果時玩得好開心，校長又請飲「氣水」But我一D都唔渴望去要尼罐野。D導師要我地服務佢地，即幫佢地按摩，我真係心諗：我地仲支力過你啦，有乜理由要我地幫你按摩呀？咩尊師重道，我話你唔尊重學生呀！

食飽飽喇，又罰過，有少少胃痛，有少少因為個肚好凍（流汗）而痛，有少少開始作嘔，我好朋友婉霖都話佢都係，好辛苦。要叫口號，又話我地叫得唔好，所以又罰。一時罰鴨仔跳（扮鴨跳），一時罰捉腳「掙」原地行，一時罰掌上壓，做左幾樣，隻腳已經好支力，差唔多郁唔到，企都企唔到，佢仲要罰鴨仔跳，尼刻我真係有D想喊出黎，但我唔係傷心，唔係因為支力，而係我感到極度極度憤怒囉。我好憎果班導師，淨係識罰人。罰完要我地跳舞，尼一刻我就快嘔出黎，頂唔順，極之想嘔，但又要撐落去，所以我死撐到晚飯。然後玩水球大戰，我地見到班主任超開心，個個撲晒去佢度，都唔記得左「打招呼」，差D又比人罰。我地睇水球大戰，完左一定跑過擁抱，即使輸左定贏都好，尼個係我琴日唯一一個覺得做得o岩既野。

食完晚餐，又要上去跳舞，真係癡癡地，今次我無作嘔，但個胃勁痛，婉琳受唔住走開左。跳完，又聽廢話，係咁話我地無上進心，懶，蠢，我心諗：乜都你講晒啦，一定架？佢叫我地可以得底頭，我就順便睡一睡，我唔想反思，反正反思都係會訓著。（跳過好多野）番屋企，我同一個同學傾話係比人罰好辛苦，個同學話佢個班有人喊左，佩珊淨係聽到個喊字，走埋黎答嘴話我喊左呀！我惡瞪佢一眼同佢講，我地講緊比人罰到喊，唔係你果種聽到畢業歌就喊呀！

後記：佢地成日話係黎訓練我地紀律，又話要相親相愛，但係佢地成日講野自相矛盾，仲有呀！紀律唔係咁訓練架，你地就只係折磨學生，唔聽你講就罰，係唔可以訓練紀律。我睇番張通告，話咩通個尼個活動可以令學童無晒臭脾氣，唔好意思，我D脾氣臭足100000000000000000000000年，我唔會驚你囉，無理咁罰人，鬧人也是。